1Cor 5 | GbrGAW | STEP | Zaho-zahoi da lo ge ɓenukwoi ku zhin nʼfya tasin, ɓenukwoi n na ɓenai ta zhin ce pyam. Oza lo n dna fya duwa nyakun n dna laifi nwo dadanyikwo yi.

1 Corinthians 5

Bulus Ge A To Bwa Jedoɓe Nzahim

1 Zaho-zahoi da lo ge ɓenukwoi ku zhin nʼfya tasin, ɓenukwoi n na ɓenai ta zhin ce pyam. Oza lo n dna fya duwa nyakun n dna laifi nwo dadanyikwo yi. 2 To fya zhin aɓoko ge na, fye gye ge fye fi n zafun nu? Ai ko kamata lo bugba wunfye ɓedo vinyiko yi, har fya gye fye la zayi pya biya n fya tasin.

3 – 4 Ko da shike mi to gni lo nfya bam, mi zhin ɓeye nubo lo zin. Dna yi Dagayi Yesu ye, mi la ɓo zhin nubo n na ɓa zhin sai ho gna ngye mi gni lo ɓo. Fye yi yezhi aduwa nyakun nya-iko Dagayi Yesu nya ɓa kunsun fyei dna fye yezhi mi, omihin ce n kunsun lo nfyei dna zafun 5 a la zayi pya biya n na duwa nyakun, a gawo n shetan akun wa wu wo nayi, nna wyetu-yi ge owo wye-wyei ɓei po dna nyipyei nʼyi Dagayi Yesu Kristi ɓei jezeɓe ncei nyi.

6 Ko zhin ɓo nukwoyi nu fyei gma ntu fye gyi-gyi ɓo, ama fyei fa ɓeye pya koi gyabye. Fye ta kpe lo ge n na fa zaknayi dna wo laifi, sa fyewyi aɓa wan wo zokwo m? 7 Fye la ʼza nukwoi ye gmiya n fye tasin, n na bai fya ze aza gyi-gyi-yi. Aɓei la Kristi-Shekwoyi Kugya Ɓiyi-wu ntu yi ɓo. 8 Ntu cenu yi nya agmada tu Wo, ya dna kala dna Yesu-vi zokwo, ya zokwo kwokwoi ya nko nuwun yi viyan ɓedo n ko kpi zhin yi. Yi nya gmada tu bredi Gyi-gyi yi, mwa-mwa nya, n gaiciya nya yi.

9 Dna wasika n mi ɓei ka fye nyi, mʼɓei gna fye ge fye to ye ɓedo n na ɓenukwoi zhin-yi yim. 10 Mi to ɓei da a Shetan da nu ɓo n ɓa zhin anagbai nyi, ko aɓo wyedai, ko avi, ko ashan-gba yim. Ntuge fye ta kpefi n nanyi ye n tna aza deye pyam. 11 Nya mi ɓei zhin nufi cei ko nu nyi ge, fye to ye ɓedo n zayi nwo yi wohin ge wo zhin Yesu viyi, ama woi ce woi zhin anagbai, aɓowyeda, woi gba a shan, ko woi gyi azafi laɓa, ko woi wyi ʼvi, ko woi sin eje, ko woi kni aza akmi. Ko nyagyi, fye to gyi nʼza deye pya yim.

Eyi Tnu-tnu Nu Ya Da Yihin Owa

12 Eyi tnu-tnu nu to ya da abmida wam. Ama ɓehin-hin eyi tnu-tnu nu ya da aza wa, ya zhin ɓa ɓo dai-dai In ɓa lo aduwa nyakun ge a Yesu viyi, ɓai gwo alaifi ye pya zhin nyi.

13 Shekwoyi nwo gmanyi yi, Wo nu zhin abmida ʼwadayi. Ama ofye fyehin ce, fye zhin nʼzayi yi, fya gmi wo ya nfya duwa nyakun.